Në Komisionin e Ligjeve është zhvilluar seanca degjimore me kandidatët për avokatë të popullit.
Një prej tyre ishte dhe avokati Altin Goxhaj, i cili tha se që në nisje mbledhja ka qenë jashtë ligjit, për shkak se 7 nga kandidatët nuk i plotësojnë kriteret për të qenë pjesë e garës. Goxhaj e vendosi theksin te ndalimi i shpopullimit të vendit.
‘Problemi më i madh që ka sot Shqipëria është shpopullimi, avokati i popullit duhet të jetë me njerëzit nëpër komisariate, jo të veshë këpucë me fin. Edhe nëse nuk zgjidhem në këtë post, ne e kemi ndarë mendjen që do të ndërtojmë rrjetin e avokatit të popullit në të gjithë Shqipërinë’, tha Goxhaj.
Teksa replikoi me Enkelejd Alibeajn, Goxhaj tha se opozita duhet të ishte e para që të mbështeste kandidaturën e tij.
“Kjo është një qeveri armike, nuk mund ta konsideroj shkelëse, se është një gjë që e zgjidhim kollaj. Këtë frikë që i ka shkaktuar shteti qytetarit, të jetë avokati i popullit që ti krijojë frikë policëve. Ka një axhendë të pastër për shpopullimin e vendit, shteti mund të të prishë kur të dojë pronën dhe biznesin, pra qytetari shqiptar rrënohet dhe nuk di çfarë të bëj.
Kjo e ka bërë të pamundur jetesën në Shqipëri, do të ushtroj një asistencë ligjore falas për të gjithë këta njerëz, me 200 të rinj asistente, që kanë mbaruar shkollën. Juve nuk iu pëlqen kandidatura ime, unë jam avokat që njerëzit thonë që kemi Altinin që na nxjerr nga burgu, falas. Unë respektoj ligjin, dhe ligji është gjithçka për mua”, u shpreh më tej avokati.
Goxhaj u shpreh se ai është i bindur që nuk do të votohet për postin e avokatit të popullit, sa kohë që axhenda e tij është e qartë kundër Soros.
