Nga Boldnews.al
Viti 2023 do të jetë vit zgjedhor. Në Shqipëri do të mbahen zgjedhjet lokale, Erion Veliaj do të provojë sa “forcë” në një garë me kandidatë përballë dhe pa suportin e LSI.
Por, megjithëse jemi më pak se 1 vit nga këto zgjedhje, Erion Veliaj, ka filluar përgatitjet. Apo të paktën, ka zgjidhur qesen, duke filluar propagandën me “ushtrinë” e punonjësve që ka në Bashkinë e Tiranës. Ai nuk ka zgjidhur “qesen” nga kursimet e shitjeve të fiqve, por ka futur duart në buxhetin e Bashkisë së Tiranës, duke e përdorur për interesa të tij. Redaksia e Boldnews.al ka siguruar disa dokumente, nga një tender që po kryen Lali Eri, i cili ka akorduar plot 1 milionë USD për të zhvilluar aktivitete. Por, këto aktivitete ai do t’i kryejë për plot 12 muaj, ccka përkon edhe me kohën e fushatës apo zgjedhjeve lokale të 2023-shit.
Sipas dokumenteve që disponon Boldnews.al, Bashkia e Tiranës ka hapur tenderin me procedurën “marrëveshje kuadër me disa operatorë ekonomikë ku jo të gjitha kushtet janë të përcaktuara”. Objekti i tenderit është “blerje shërbimi për aktivitete të ndryshme për Bashkinë Tiranë”. Ndërsa fondi limit është plot 83,333,175 lekë pa TVSH, ose me TVSH rreth 1 milionë USD.
Në dokumentet shoqëruese, Bashkia e Tiranës shkruan se këto para janë hedhur “në kuadër të shpalljes së Tiranës ‘Youth Capital 2022’, si dhe duke marrë në konsideratë situatën e krijuar nga pandemia ku shumë aktivitete dhe evente janë anulluar, Bashkia e Tiranës ka planifikuar së fundmi të kryejnë një sërë aktivitetesh të ndryshme dhe eventesh me të gjitha ambasadat e jo vetëm”. Pra, për të shpenzuar para, Veliaj përmend edhe ambasadat.
Në dokumentet e këtij tenderi, Bashkia e Tiranës shkruan se “këto aktivitete do të shërbejnë për promovimin e qytetit, atraksionet turistike, vlerave kulturore të qytetit, punëve të kryera nga Bashkia e Tiranës dhe forcimin e marrëdhënieve sociale, kulturore, ekonomike dhe politike”.
Por në fakt promovojnë Lali Erin, në vitin zgjedhor! “Janë planfikuar nga drejtoritë përkatëse që mbulojnë dhe menaxhojnë fushën e aktiviteteve në Bashkinë e Tiranës organizimi i disa koncerteve të përmasave të mëdha me artistë të njohur vendas e të huaj” thotë Bashkia, por që këto para po hidhen në kulmin e rritjes së ccmimeve, nga karburanti te shporta e ushqimeve bazike të shqiptarëve.
Në dokumentin e mësipërm, Bashkia e Tiranës shkruan se fituesi do të lidhë kontratë për zbatimin e termave të marrëveshjes sa herë që AK të ketë nevojë për zhvillim aktiviteti. Në këtë kontratë do të përcaktohen në mënyrë të detajuar modalitetet e procesit të minikonkurrencës. Dhe, pas lidhjes së kontratës, do të zhvillojë rast pas rasti procesin e minikonkurrencës.
Por, sa do të zgjasë?! “Procesi i minikonkurrencës do të organizohet nga nënshkrimi i marrëveshjes kuadër për një periudhë 12 mujore, sa herë që do të evidentohet nevoja për aktivitetet që do të zhvillojë Bashkia Tiranë përgjatë periudhës kohore 2022-2023” shkruan Bashkia e Tiranës.
Por, a nuk është fushata dhe zgjedhjet në 2023 dhe përse një shumë kaq e madhe për aktivitete, ku fare mirë mund t’i organizojë “ushtria” e propagandës së Veliajt në bashki dhe në institucione varësie?!
