Aleanca për Mbrojtjen e Butrintit e ka zhvendosur protestën përpara zyrave të Fondit Shqiptaro Amerikan të Zhvillimit.
“Larg duart nga Butrinti” ishte mesazhi që Aleanca i ka drejtuar Fondit, i cili bazuar në draftin ligjor që pritet të hyjë në zbatim i jep me koncension parkun e Butrintit FSHAZH.
“Kemi pikëpyetje të mëdha se si ka mundësi që avokatja e inceneratorëve ndodhet pas aferës së Butrintit, ashtu siç kemi pikëpyetje të mëdha pse pas Butrintit, po bie Durrësi, Driloni, Pallati i Brigadave, Apolloni, Finiqi dhe çdo kala shqiptare?! Kjo qeveri është kthyer si një ushtri pushtuese që po merr me radhë kalatë shqiptare!”, thanë pjesëmarrësit në protestë.
Sipas protestuesve qeveria është kthyer në një pushtuese, që po merr me radhë të gjithë trashëgiminë kulturore. Sipas tyre, marrëveshja e radhës, pas Durrësit është Driloni.
Ata i bënë thirrje Michael Granoff që të distancohet nga afera korruptive, “e oligarkëve shqiptarë të cilës po njollosin emrin e tij dhe flamurin amerikan.”
Aktivistët paralajmëruan që gjatë ditës së nesërme, protesta e tyre do të zhvendoset përpara ambienteve të Parlamentit, ku pritet të kalojë për miratim ligji.
