Nga Boldnews.al
Shtëpitë e pushimit të qeveritarëve janë kthyer në resorte, ku çdo javë, Drejtoria e Shërbimeve Qeveritare, u rinovon mobiliet, tekstilet, enët e guzhinës dhe gjithçka tjetër. Vilat e pushimit janë në gjithë vendin, por aktualisht ato më të preferuarat janë në plazhet në Jug të Shqipërisë.
Boldnews.al ka hulumtuar edhe më parë shpenzimet e këtyre vilave, ndërsa drejtoresha e Shërbimeve Qeveritare, Dhurata Frashëri, u ka bërë herë pas here “dhurata” eprorëve të saj.
E vendosur në atë pozicion prej vitesh, Dhurata ka qenë “dorë lëshuar”, teksa u ka plotësuar çdo tekë këtyre shtetarëve, nga çarçafët, te perdet, enët apo edhe çfarëdolloj pajisje apo sendi, ku ata të mos ndihen si në “shtëpi të huaj”.
Natyrisht, ato janë shtëpitë e shqiptarëve, janë ndërtuar dhe mirëmbahen po nga taksat e shqiptarëve të varfër, të cilët me kursimet e 1 viti mezi ia dalin që të shkojnë 1 javë me pushime.
Por, drejtuesit e shtetit, krahas privilegjeve të tjera, gëzojnë edhe të drejtën që të pushojnë në këto shtëpi, në privatësi të plotë apo edhe me kushtet e resorteve më të shtrenjta të paktën në Europë.
Në këto radhë do të ndalemi te tenderi i tekstileve, i kryer nga Dhurata Frashëri.
Sipas dokumenteve që disponon Boldnews.al, Drejtoria e Shërbimeve Qeveritare, me adresë te Pallati i Kongreseve, ka hapur tenderi me objekt “blerje materiale tekstile për vitin 2022”. Fondi limit i kësaj procedure është 2.974.183, pa TVSH. Ose me TVSH rreth 30 mijë euro. Mësohet se kohëzgjatja e marrëveshjes është vetëm 7 ditë. Pra, këto materiale kërkohen me shpejtësi nga kjo drejtori.
Boldnews.al hulumtoi dokumentet shoqëruese, ku kjo drejtori kërkon një sërë artikujs, duke filluar nga çarçafët markë, jorganët, perdet e errëta apo edhe piceta këmbësh. Madje, peshqirë markë EU, që shtetarët të mos grricen. Madje edhe rrobdishamë, apo edhe shalle që mos të ftohen. Nëse 95 % e shqiptarëve nuk i ka të gjitha dhe cilësore këto artikuj, këta shtetarë po i gëzojnë edhe në shtëpitë e pushimit!
Në dokumentet e publikuara në Agjencinë e Prokurimit Publik, kjo drejtori kërkon 31 sete peshqirësh “100% pambuk”. Gjithashtu, 36 copë robdishanë pa kapuç, me ngjyrë të bardhë me materiale 100% pambuk.
Kërkojnë peshqir të vogël, peshqir për këmbët që të jetë 100% pambuk. Kërkojnë 28 sete çarçafësh për krevat doppio, jorganë të trashë, jastëkë të fortë. Kërkojnë edhe shall dopio, me material kundër zjarrit, përbërja e të cilit duhet të jetë 61% poliestër dhe 39% poliestër e thjeshtë.
Më pas kjo drejtori kërkon një mori perdesh, me ngjyra të ndryshme apo edhe “perde e errët për bllokimin e dritës”. Madje, perdja duhet të jetë me material 100 % pambuk. Gjithashtu, në specifikime kërkojnë perde me motive aziatike, me material 63% pambuk dhe 32% mëendafsh.
Lista vijon me piceta këmbësh për hoteleri, me ngjyrë gri të hapur, të cilat duhet të jenë “metrazh pambuk 100%” me ngjyrë qumështi. Natyrisht, kanë udhëtuar shumë në botë, në hotele me 5 yje, ku këto sende i kanë parë në ato dhoma dhe përse mos t’i marrin edhe në këto shtëpi pushimesh?!
