Akademiku Artan Fuga tha se në protestën e 7 korrikut kishte një numër të madh njerëzish. Duke folur në rubrikën “Opinion”, në News24, akademiku u shpreh se numri i madh i qytetarëve në protestë nuk përkthehet domosdo në mbështetje ndaj opozitës.
Fuga u shpreh se protesta tregoi se jo vetëm pakënaqësia është e madhe, por ekziston edhe shpirti i protestës, ndaj dhe sipas tij, problemi është tek opozita, e cila jo vetëm që duhet të sjellë modele, por edhe duhet të demokratizohet.
“Mendoj që pakënaqësitë janë shumë të përhapura. Njerëzit e pakënaqur janë në mënyrë masive, dhe unë personalisht nuk kam nevojë të shkoj në protestë, por mjafton ët shikoj zgjedhjet e 25 prillit dhe them se kanë votuar 25% e popullsisë për qeverinë. Kjo do të thotë se 50% nuk kanë ardhur dhe as që duan t’ia dinë fare, dhe një pjesë që kanë votuar kundër.
Pra, 60-70% e popullsisë është e pakënaqur. Fakti që njeriu zhvendoset në bulevard për ta demonstruar pakënaqësinë dhe fakti është që kishte një popullim të mirë të bulevardit, do të thotë që jo vetëm pakënaqësia ishte, por edhe shpirti i protestës është. Por, një zë kundër qeverisë nuk përkthehet domosdo në një zë pro opozitës. Ka një energji, por jo në mënyrë automatike, sepse hyjnë edhe faktorë të tjerë.
E para, kjo pakënaqësi e masave ka nevojë të përkthehet në modele politike, dhe unë shikoj që opozita është shumë shumë e varfër, edhe për shkak të defekteve të saj të rënda këto 10 vitet e fundit. E dyta, ka një braktisje totale të opozitës dhe drejtuesve të saj.
Opozita akoma nuk e ka marrë veten dhe nuk e di pse është e ngecur akoma, thotë që unë e mbush sheshin, por nuk bën modele të reja për shkollën, për arsimin, për ekonominë, etj. Nëse kjo nuk përpunohet si duhet, ajo pakënaqësia ngel si një ujë që zien, por nuk sjell asgjë. E treta ka të bëjë me demokratizimin brenda opozitës. Pra, të dalin kandidatura të reja, energji të reja intelektuale, të mos ketë një mbyllje të njerëzve që rrotullohen e rrotullohen prej vitesh. Unë them që militanti e ka bërë gjithmonë detyrën e tij, por përkthimi politik i kësaj energjie nga ana e politikës të të gjitha krahëve, ka qenë shumë poshtë”, tha akademiku Fuga.
