Kreu demokrat Sali Berisha, u shpreh gjatë një takimi me drejtuesit e degëve të PD të Tiranës, se ka një ngjashmëri shumë të madhe mes Sri Lankës, ku populli u ngrit dhe rrëyoi Qeverinë, dhe Shqipërisë.
Berisha tha se ka shumë ngjashmëri dhe këtë po e thonë mediat më prestigjoze të botës. “Nëse në Sri Lanka paratë e vjedhura u gjetën në pallatin presidencial, në Shqipëri ato i keni të ndara në kontot bankare”, tha Berisha.
Sipas tij, sirenat e alarmit po bien në çdo familje shqiptare, për shkak të varfërisë që kjo qeveri ka shkaktuar, përmes vjedhjes, korrupsionit, shpërdorimit.
“Ju i keni ndjekur zhvillimet në Sri Lanka. Ju e patë që populli i Sri Lankës përmbysi pushtetin e presidentit. Mediat më serioze të botës kanë krahasuar Shqipërinë me Sri Lankën dhe unë ju them ju se në shumë aspekte ngjasin si dy pika uji.
Ajo që patë në Sri Lanka dhe kjo që po ndodh në Shqipëri, kanë të njëjtat shkaqe. Sri Lanka para dy vitesh kishte borxhin 91%, sot e ka 119%. Shqipëria para 1 viti e kishte 81%, sot e ka 107%. Pra, rritja e borxhit në Shqipëri është më e shpejtë se në Sri Lanka, për të përfunduar me 120 apo 130% në fund të vitit.
Në Sri Lanka paratë e vjedhura ishin futur në valixhe në pallatin e Presidencial, në Shqipëri paratë e vjedhura vendosen në kontot bankare të të vdekurve, të pensionistëve, plus qindra milionë që përfundojnë në bankat off shore. Në Shqipëri, më shumës e në Sri Lanka, u rritën ccmimet dhe rriten vetëm nga vjedhja e qeverisë”, tha ai.
Në vijim Berisha ngriti pzetjen “sa do lejojmë ne që të rripen e varfërohen qytetarët shqiptarë? Nëse opozita do të ishte në lartësinë e duhur, sot Edi Rama nuk do të ishte kurrë Kryeministër, por do të ishte në burg. Ne kemi humbur kohë, qytetarët na u përgjigjën sepse besuan se ne jemi opozita e vërtetë”.
Ai shtoi se Edi Rama po mendon si të legalizojë paratë e krimit dhe si ta mbushë vendin me drogë.
“Pas suksesit të 7 korrikut, rruga për suksesin tjetër është e përpjetë, por ne do e përshkojmë atë se kemi vullnet të hekurt. Ajo protestë nuk ishte mbështetje për Berishën, por ishte mbështetje për kauzat”, tha Berisha.
