Kreu i PD, Sali Berisha, zbuloi se si do ta organizojë punën, nëse ai vjen në pushtet.
I ftuar në emisionin “Open” në News24, Berisha tha se do të krijojë mekanizmat më të fuqishme të transparencës, që sipas tij, do t’i bëjnë një luftë pa kompromis vjedhjes.
Mes të tjerash, ai akuzoi qeverinë e Edi Ramës për vjedhje në rrugën Farkë-Elbasan, teksa tha se kur ka dorëzuar çelësat e pushtetit, rruga ka qenë e prokuruar me 250 milionë euro, ndërsa tani ka shkuar në 430 milionë euro.
“Zero tolerancë ndaj vjedhjeve të këtij vendi. Do të krijohen mekanizmat më të fuqishme të transparencës, do përzgjidhen shqiptarë nga diaspora dhe Shqipëria, të cilët do t’i bëjnë një luftë pa kompromis vjedhjes. Kam qenë 8 vite në pushtet, kam rritur borxhin 4.4%, dhe me atë borxh janë ndërtuar 11 mijë metra rrugë, janë dyfishuar rroga e pensione dhe vendi ka kaluar nga grupi i vendeve me të ardhura të ulëta, në grupin e vendeve me të ardhura të mesme-të larta, dhe prapë them se ka pasur korrupsion.
Por, sot, po të jap vetëm një shembull. Ke këtu rrugën Farkë-Elbasan, kur kam dorëzuar çelësa e pushtetit, rruga e ka qenë e prokuruar me 250 milionë euro, ka qenë e përfunduar komplet Ibë-Elbasan dhe ka qenë trase e hapur Ibë-Tiranë. Sa kanë shkuar ato 7 km? Ka shkuar rruga 430 milionë euro, 7 kilometra. Ky Xhika, ish-drejtori i Rrugëve, që e arrestuan, ju thashë që do të dalë, sepse i ka në dorë. Çfarë bëri ai? Për këtë rrugë, solli në parlament shtim-kontrate 5 milionë euro. Dhe e liruan Gjikën”, u shpreh Berisha.
