Ish kryeministri Sali Berisha, përmes një dalje mediatike, mbrojti deputetin Ervin Salianji idhur me çështjen “Geron Xhafaj”.
Ai tha se çështja do të gjykohet nga gjyqtarja Edlira Petri, bashkëshortja e nënkryetarit të Gjykatës së Lartë, Sokol Sadushi, për të cilën Berisha kërkoi ndjekje penale.
Ndërkohë, ish-kryeministri ka paralajmëruar se çështjen deputeti Salianji do e bëjë ndërkombëtare e nuk do pranojë kurrë që në Shqipëri të rikthehen proceset e gjyqeve politike.
“Hakmarrja e mafies shtetërore është e verbër. Sot në orën 14:00 në gjykatën e Apelit gjykatësja ‘Petra Sadushi’ burri i të cilës është i lidhur kokë e këmbë me klanin Xhafa dhe është komisari politik i partisë në drejtësi ka hedhur shortin e caktuar datën e gjykimit. Në vend të tërheqjes së menjëhershme nga procesi, ajo ka marrë përsipër të çojë më tej veprën kriminale të mafies shqiptare. Të dashur qytetarë, reforma ka prodhuar një specie gjykatësish të cilët nuk ngurrojnë të shkruajnë ligjin e jo të bëjnë ligjin në sallat e gjyqit, si ‘Petra Sadushi’”, tha Berisha.
“Unë jam sot këtu para jush për tu bërë thirrje gazetarëve të ndjekin këtë proces të turpshëm politik që ka fytyrën e bulën e mafies shtetërore shqiptare. Për t’i bërë thirrje të përndjekurve politikë që u dënuan me gjyqet e diktaturës ta ndjekin këtë proces si dëshmi e rikthimit të proceseve staliniste në Shqipëri nga Rama. Ju bëj thirrje mbarë qytetarëve të reagojnë ndaj këtij procesi. Jam këtu për të kërkuar ndjekjen penale të Ardi Veliut, të ish-kryepolicit të Fierit Albert Nushi të oficerëve të turpshëm bashkëpunëtore në trafiqe të SHISH që manipulojnë e falsifikojnë prova, ndjekjen penale të Artan Gjermenit, të Petra Sadushit që në verbëri zbatojnë urdhra politikë. Çështjen Salianji PD do e bëjë një çështje ndërkombëtare e nuk do pranojë kurrë që në Shqipëri të rikthehen proceset politike”, shtoi ai.
