Pavarësisht se socialistët më në krye shefin e mazhorancës janë vendosur që të mos e çojnë Xhaçkën të përballet në kushtetuese me akuzat e PD për konflikt interesi për përfitim nga pronat publike nëpërmjet bashkëshorit të saj, PD nuk heq dorë nga pretendimi i saj për t’ja hequr mandatin deputetës socialiste. Mazhoranca dhe opozita u dakordësuan sot që Xhaçka të japë versionin e saj në Këshillin e Rregulloreve, por kjo ftesë do të mbetet në vullnetin e ministres nësë do të pranojë apo jo.
Partia Demokratike nuk heq dorë nga mandati i deputetës socialiste Olta Xhaçka me akuzën se është në konflikt interesi me statsuin e investitorit strategjike të përfituar nga bashkëshorti i saj me vendim të qeverisë së Edi Ramës. Në këshillin e mandateve socialistët u munduan ta mbrojnë kolegën e tyre, por demokrati Gazmend Bardhi i ballafaqoi me provat dhe ligjin.
Mazhoranca pretendon se në llogari të Olta Xhaçkës nuk ka hyrë asnjë qindarkë nga përfitimet që ka marrë bashkëshorti i saj me shfrytëzimin e bregdetit në Himarë.
Taulant Balla: A ka fituar zonja Olta Xhaçka një qindarkë?
Gazmend Bardhi: Pyetja është pa sens. Përdorimi i plazhit është veprimtari fitimprurëse. Nuk besoj se Olta Xhaçka do shtrojë shezlone falas.
Për të treguar që nuk e lëshon lehtë ministren e tij përballë një opozitë të përçarë, kryeministri Rama u shfaq në krah të Olta Xhaçkës në konferencë për gazetarët, në të njëtën kohë kur PD i kërkonte socialistëve mandatin e deputetes socialiste. Anëtaren e kabinetit të tij, Edi Rama e mbrojti vetëm politikisht
Edi Rama: “Të kërkosh këtu konflikt interesi, do të thotë faktikisht të kërkosh të zhveshësh nga e drejta e pronës private njerëz, të cilët janë në punën e tyre dhe këtu s’ka asnjë përfitim. Këtu qeveria nuk ka dhënë asgjë faktikisht, zero, nuk ka dhënë qeveria asgjë. Qeveria thjeshtë nuk ka shkelur një të drejtë që buron nga ligji dhe nga e drejta e pronës private. Ajo që unë kam kërkuar tani është që ta heqim fare këtë pjesë të futjes së qeverisë në këtë mes që të mos kemi më as këto llafe, që janë llafe të fukarallëkut mendor që prodhon maskarallëk, kështu e konsideroj unë këtë.”
Ministrja e Jashtme insiston që ajo dhe bashkëshorti i saj nuk kanë përfituar pronë publike, por nga godina përballë, Gazmend Bardhi thotë se Xhaçka gënjen.
Gazmend Bardhi: Zonja Xhaçka është aksionere në vlerë të barabartë për çdo pasuri të vënë gjatë martesës. Ministrja nuk e ka pronën 100% por 50%.
Opozita është e bindur se Olta Xhaçka do të përfundojë në Gjykatën Kushtetuese, me apo pa dëshirën e PS.
Këshilli i Mandateve u dakordësua t’i bëjë ftesë Olta Xhaçkës që të dëgjohet nga deputetët, nësë ajo e sheh të nevojshme që të mbrohet përballë akuzave të opozitës. /Oranews/
