Në mandatin e parë të Edi Ramës si Kryeministër, ishte Saimir Tahiri, i cili mbante postin e ministrit të Brendshëm, dhe sot vuan dënimin në burgun e Fierit, që sulmonte gjyqtarë dhe prokurorë, madje duke hartuar edhe “listat e zeza” me emrat e tyre. Historia e Tahirit dihet si shkoi, ndërsa vendin e tij në sulmet ndaj drejtësisë duket se e ka zënë Erion Veliaj, Kryebashkiaku i Tiranës.
Veliaj u shfaq pak kohë më parë ndërsa paralajmëronte kreun e FSHF-së, Armando Duka, se do të kishte punë me SPAK, ndërkohë që sot u ka bërë thirrje të gjyqtarëve, që sipas tij përpiqen të bllokojnë punën e Bashkisë së kryeqytetit, për të çliruar varrezat e Sharrës nga zaptuesit.
Madje Veliaj ka zgjedhur të paralajmvrojë se këta gjyqtarë s’do ta kenë të gjatë në detyrë. Nuk dihet se ku e bazon Kryebashkiaku bindjen dhe sigurinë e tij se gjyqtarët që i etiketon si bllokues të zhvillimit të Tiranës, nuk do e kenë të gjatë, por paralajmvrimet e tij kalojnë në heshtje, dhe çuditërisht nuk konsiderohen si sulme ndaj drejtësisë.
“Ndjehem shumë i keqardhur që ka ende gjyqtarë, në pritje të Vettingut, që bllokojnë Bashkinë e Tiranës të çlirojë varrezat e “Sharrës”, dhe kur shikoj gjyqtarë të Gjykatës Administrative, që japin urdhra bllokimi kundër punës së bashkisë.
Flitet për varrezat e vjetra që janë zaptuar duke ndërtuar mbi to shtëpi, të cilat bashkia ka 7 vjet që kërkon t’i largojë por gjykata thotë “jo”. Varrezat janë për të respektuar të parët tanë që nuk jetojnë më. Kurse në vitin 2022 kemi vendime gjykatash që bllokojnë bashkinë nga çlirimi i varrezave.
Gjyqtarit nuk dua t’ia them emrin, por heshtja ime nuk do të zgjasë shumë. Në varreza do të përfundojmë të gjithë një ditë, por do të jetë për turpin e këtij gjyqtari që bllokon punën që bashkia të çlirojë varrezat.
Këta i rrjepin njerëzit përkohësisht, derisa t’ju vijë Vettingu, por këta nuk do të vazhdojnë më në drejtësi sepse unë do të jem i pari që do të denoncoj një gjyqtar që bllokon çlirimin e varrezave, çlirimin e Liqenit, çlirimin e Liqenit të Thatë nga zaptimet m’u në mes ose në buzë të ujit. Vërtet na vonojnë punën, por nuk mund të na vonojnë pafundësisht. Qyteti do të vazhdojë të ecë përpara”, tha Veliaj.
