Komiteti i Etikës në Dhomën e Përfaqësuesve në SHBA ka hapur një hetim ndaj deputetit demokrat Jimmy Gomez, pas akuzave për sjellje të pahijshme seksuale, sipas tre burimeve të cituara nga CNN.
Burimet për CNN, të cilat kërkuan të mbeten anonime, bëjnë të ditur se paneli ka nisur kontaktet fillestare për të verifikuar një artikull të “New York Post”, ku pretendohej se Gomez ishte parë duke u puthur me një asistente gjatë një feste private në vitin 2023. Zëdhënësi i tij i kishte mohuar këto akuza, duke i cilësuar si “të pavërteta”.
Sipas raportimeve, gjatë verifikimeve të këtij rasti, hetuesit kanë marrë informacione edhe për pretendime të tjera të ngjashme, të cilat tashmë po shqyrtohen në kuadër të hetimit.
Në një deklaratë publike, Gomez pranoi se ka bërë gabime personale në të kaluarën që kanë ndikuar në familjen e tij, por theksoi se ato nuk përbëjnë shkelje ligjore apo shkelje të rregullave të Kongresit. Ai u shpreh i gatshëm të bashkëpunojë plotësisht me Komitetin e Etikës dhe të japë çdo informacion të nevojshëm.
“Vite më parë kam bërë gabime personale jashtë martesës që kanë shkaktuar dhimbje reale për familjen time. Edhe pse veprimet e mia ishin konsensuale dhe nuk shkelin ligjin apo rregullat e etikës së Dhomës së Përfaqësuesve, kjo nuk e zbeh ndikimin që kanë pasur tek ata që dua më shumë,” deklaroi ai
Hetimi ndaj Gomez, i cili nuk ishte bërë publik më herët dhe ndodhet ende në fazat e para, shihet si pjesë e përpjekjeve të Komitetit të Etikës për të trajtuar seriozisht akuzat për sjellje të pahijshme brenda Kongresit amerikan.
Komiteti nuk ka pranuar të komentojë mbi çështjen, ndërsa Gomez përfaqëson distriktin e 34-t në Kaliforni.
