Deputeti i Partisë Demokratike, Grigels Muçollari, ka reaguar përmes një postimi në Facebook lidhur me procesin e integrimit europian të Shqipërisë dhe kushtet e vendosura nga Bashkimi Europian.
Muçollari deklaron se Brukseli dhe vendet anëtare të BE-së i kanë kërkuar Shqipërisë luftë reale ndaj korrupsionit, lidhjeve me krimin, garantimin e drejtësisë së pavarur dhe zhvillimin e zgjedhjeve të lira e të ndershme.
Sipas tij, pavarësisht këtyre kushteve, BE ka vendosur të ulet në tryezë me qeverinë që, sipas opozitës, është vetë përgjegjëse për këto probleme.
Deputeti demokrat shprehet se “ajo që nis sot është provimi i vështirë për Edi Ramën”, duke akuzuar kryeministrin se deri tani është marrë me propagandë dhe jo me plotësimin e kushteve të vendosura nga Brukseli.
Sipas Muçollarit, pas publikimit të raportit të IBAR, Kryeministri Edi Rama nuk ka folur për asnjë nga detyrat konkrete që kërkon BE, por është fokusuar vetëm te sulmet ndaj opozitës.
REAGIMI I PLOTE
Pasi Brukseli dhe vendet anëtare të BE-së thanë se Shqipëria duhet të luftojë korrupsionin, lidhjet me krimin, duhet të lejojë drejtësinë të veprojë e të mos ruajë imunitetin e qeveritarëve, si edhe të garantojë zgjedhje të lira e të ndershme, u vendos të ulen në tryezë me qeverinë së cilës i adresohen të gjitha këto shqetësime, kërkesa dhe kushte.
Ajo që nis sot është provimi i vështirë për Edi Ramën, i cili deri më tani ka lundruar nëpër qendrat e Europës me batuta e atlete.
Që në momentin kur doli raporti i IBAR me detyrat e rrepta të shtëpisë, Kryeministri ynë, në asnjë rast e për asnjë minutë, nuk ka folur për asnjërën prej tyre. Ka disa orë live në dorë, por hesht për kushtet.
Vetëm shan e mallkon Opozitën. Dhe kjo sjellje e nxjerr zbuluar. Ai nuk e do, në fakt, integrimin; thjesht e shfrytëzon këtë moment për politikën e ditës.
Nëse vërtet do të punonte për ecjen përpara, reagimi i parë i një kryeministri në këto kushte do të ishte: e ka lexuar me vëmendje çfarë kërkon Brukseli dhe çfarë duan vendet anëtare, dhe se do të bëjë gjithçka për t’i realizuar.
Edi Rama do duhej të dilte në publik e t’u thoshte shqiptarëve se do të angazhohet të mos mbrojë me vota në Kuvend korrupsionin; se do të luftojë krimin dhe bandat; se do të respektojë Kushtetutën dhe vendimet e Gjykatës Kushtetuese; se do të punojë për zgjedhje të lira e të ndershme; se do të ndalojë ushtrinë e patronazhistëve; se nuk do të blejë e nuk do të kërcënojë me vendin e punës për votën; dhe se do të ketë transparencë për koncesionet e tenderat.
Këtë duhet të bënte një kryeministër i përgjegjshëm.
Asnjë fjalë për këto. Asnjë reflektim. E vetmja gjë: sharje, ofendime dhe mallkime për kundërshtarët, për Partinë Demokratike.
Ndaj, Edi Rama është në fakt kërcënimi më i madh për integrimin, sado të shkojë në Bruksel e të bëjë propagandë. Duhen vepra. Vepra që flasin. Dhe ato të Kryeministrit tonë flasin për keq.
