Ish-kryeministri socialist i Spanjës, José Luis Rodríguez Zapatero, është vënë nën hetim nga drejtësia spanjolle për akuza që lidhen me ushtrim ndikimi të paligjshëm dhe korrupsion në çështjen e shpëtimit financiar të kompanisë ajrore Plus Ultra gjatë pandemisë COVID-19.
Sipas Audiencia Nacional, Zapatero është thirrur të dëshmojë më 2 qershor para gjyqtarit José Luis Calama, i cili drejton hetimin për fondet publike prej 53 milionë eurosh të akorduara për kompaninë ajrore në vitin 2021.
Autoritetet spanjolle kanë kryer gjithashtu kontrolle në zyrat e ish-kryeministrit dhe në disa kompani të lidhura me rrethin e tij familjar dhe bashkëpunëtorët e afërt.
Mediat spanjolle raportojnë se hetuesit po shqyrtojnë pagesa të dyshuara përmes firmave konsulente që mund të jenë përdorur për komisione të fshehta.
Në qendër të hetimit është kompania ajrore Plus Ultra, e cila në kulmin e pandemisë mori një kredi emergjente prej 53 milionë eurosh nga qeveria e Pedro Sánchez, përmes fondit shtetëror të krijuar për shpëtimin e kompanive “strategjike”.
Opozita konservatore në Spanjë kishte kundërshtuar ashpër vendimin, duke argumentuar se kompania kishte aktivitet të kufizuar dhe lidhje me biznesmenë venezuelianë të afërt me regjimin e Nicolás Maduro.
Në atë periudhë, kompania operonte vetëm në linja drejt Venezuelës, Perusë dhe Ekuadorit, me një flotë prej katër avionësh Airbus A340. Sipas raportimeve të mediave spanjolle, hetuesit po analizojnë nëse fondet publike janë përdorur në mënyrë të parregullt apo janë kanalizuar përmes kompanive ndërmjetëse të lidhura me persona pranë Zapateros.
Lajmi ka shkaktuar përplasje të forta politike në Spanjë. People’s Party (PP) ka sulmuar drejtpërdrejt socialistët, duke akuzuar qeverinë për korrupsion sistematik.
Nga ana tjetër, Spanish Socialist Workers’ Party (PSOE) ka kërkuar respektimin e prezumimit të pafajësisë dhe ka mbrojtur figurën e ish-kryeministrit. Hetimi konsiderohet historik, pasi është hera e parë në demokracinë moderne spanjolle që një ish-kryeministër vendoset zyrtarisht nën hetim në një çështje korrupsioni.
