Ndërsa është raportuar se SHBA dhe Irani janë pranë një marrëveshjeje për t’i dhënë fund luftës, Donald Trump ka lëshuar një paralajmërim në rast se Teherani tërhiqet dhe bën hapa pas duke mos pranuar dakordësinë.
Në një postim në Truth Social, Presidenti i SHBA shkruan se nëse Irani pranon atë për të cilën ka rënë dakord, operacioni do të marrë fund dhe Ngushtica e Hormuzit, e bllokuar prej javësh, do të hapet.
Por nëse ndodh e kundërta, shton Donald Trump, do të rifillojnë sërish bombardimet dhe madje në një nivel dhe intensitet më të lartë.
“Duke supozuar se Irani pranon të japë atë që është rënë dakord, gjë që ndoshta është një supozim i madh, “Epic Fury” tashmë legjendar do të marrë fund dhe bllokada shumë efektive do të lejojë që Ngushtica e Hormuzit të jetë E HAPUR PËR TË GJITHË, përfshirë Iranin. Nëse ata nuk bien dakord, bombardimet do të fillojnë dhe, fatkeqësisht, do të jenë në një nivel dhe intensitet shumë më të lartë se më parë.”, ka shkruar presidenti i SHBA.
Më herët, Axios raportoi se SHBA dhe Irani janë pranë një marrëveshjeje për t’i dhënë fund luftës dhe për të vendosur një kornizë për negociatat mbi programin bërthamor të Teheranit.
Sipas të njëjtit raportim, SHBA-të presin që Irani të përgjigjet në disa pika kyçe në 48 orët e ardhshme, duke shtuar se “kjo ishte arritja më e afërt e një marrëveshjeje midis të dy palëve që nga fillimi i luftës”.
