Organizata Botërore e Shëndetësisë, OBSH ka deklaruar se mund të ketë pasur një transmetim të hantavirusit nga njeriu te njeriu në anijen holandeze turistike ku kanë vdekur tre pasagjerë.
Virusi zakonisht përhapet nga brejtësit, por OBSH-ja tha në këtë rast se mund të jetë përhapur midis kontakteve shumë të ngushta në bordin e anijes MV Hondius. Ajo theksoi se rreziku për publikun ishte i ulët.
Dy anëtarë të ekuipazhit do të evakuohen për qëllime mjekësore me aeroplan në Holandë, pasi kanë shfaqur simptoma akute të frymëmarrjes. Një person i lidhur me një prej viktimave gjithashtu do të evakuohet.
MV Hondius u nis nga Argjentina për udhëtimin e saj përmes Oqeanit Atlantik rreth një muaj më parë. Aktualisht është e ankoruar pranë Kepit të Gjelbër, pranë bregut perëndimor të Afrikës.
Ekipet mjekësore nga Kepi i Gjelbër, të mbështetura nga OBSH-ja, kanë hipur në anije për të ndihmuar me rastet e dyshuara. Imazhet e marra nga bordi i anijes turistike tregojnë punëtorë me kostume mbrojtëse nga rreziqet në një anije më të vogël pranë.
OBSH-ja tha se Spanja ka dhënë leje që anija të ankorohet në Ishujt Kanarie, ku mund të bëhet një vlerësim i rrezikut dhe monitorim i mëtejshëm mjekësor.
