Një imazh i publikuar nga Donald Trump në rrjetin e tij social “Truth” ka shkaktuar polemika të shumta, duke ngjallur reagime të ashpra jo vetëm nga komuniteti katolik, por edhe nga mbështetësit e tij.
Në foton e krijuar me inteligjencë artificiale, Trump paraqitet si “Mesia”.
I veshur me tunikë me ngjyrë të bardhë dhe të kuqe, me dorën e djathtë mbi ballin e një të sëmuri sikur po e shëron, ndërsa nga dora e majtë del një dritë “hyjnore”. Rreth tij shfaqen një mjeke, një ushtarak dhe figura të tjera në qëndrim adhurimi. Në sfond duken elementë simbolikë si flamuri amerikan, një shqiponjë dhe Statuja e Lirisë.
Postimi erdhi pak pasi Trump kishte sulmuar ashpër Papa Leoni XIV, në një deklaratë të bërë në të njëjtën platformë. Ai e kritikoi Papën për qëndrimin ndaj kriminalitetit dhe politikës së jashtme, duke e akuzuar gjithashtu se nuk kishte përmendur presionet ndaj kishës gjatë pandemisë së COVID-19.
Nga ana e tij, Papa Leone XIV iu përgjigj shkurtimisht gjatë një udhëtimi nga Roma drejt Algjerisë, duke deklaruar se nuk kishte frikë nga administrata Trump dhe se do të vazhdonte të fliste kundër luftës. Ati i Shenjtë theksoi se nuk dëshironte të hynte në një debat të drejtpërdrejtë me presidentin amerikan.
