PS ka shpallur në Fier nisjen e një plani të ri komunikimi, i cili sipas kryeministrit Edi Rama synon të forcojë lidhjen mes strukturave të partisë dhe komunitetit, duke kulmuar në qershor me festimet e 35-vjetorit të themelimit.
Megjithatë, prezantimi i këtij plani u shoqërua me sulme të ashpra ndaj medias, të cilën Rama e akuzoi se mbulon çështjet me rëndësi me “tymin, baltën dhe llumin e gënjeshtrave”.
Ai pretendoi se disa televizione dhe portale fabrikojnë narrativa për të çoroditur qytetarët, duke lënë në harresë tema madhore si negociatat për BE.
Rama: “Ne do të vazhdojmë këtë komunikim, i cili do të shtrihet në komunitet kur të përzgjidhen kryetarët e njësisë dhe sigurisht që do të përmbyllet në qershor me kremtimin e 35-vjetorit të themelimit të Partisë Socialiste.
E kemi zgjedhur këtë proces komunikimi, sepse na është dukur realisht e domosdoshme që të ndajmë me ju dhe përmes jush edhe me të gjithë Partinë Socialiste dhe pastaj edhe me të gjithë mbështetësit tanë informacionet dhe këndvështrimet mbi çështje që na interesojnë të gjithëve, të cilat, siç ju e dini shumë mirë, mbulohen përditë nga tymi, nga balta, nga llumi i gjithë gënjeshtrave, akuzave, shpifjeve, fabrikimeve, thashethemeve që fabrikohen në pasqyrat e kanaleve dhe të portaleve, duke praktikisht synuar në vijimësi që të tërheqin vëmendjen e njerëzve dhe mundësisht t’i çorodisin njerëzit për gjëra të cilat janë të rëndësishme, siç është për shembull procesi i negociatave për anëtarësimin në Bashkimin Europian.
Ndërkohë që nuk ka absolutisht vend fare në ato pasqyra për punët e Shqipërisë, për ato që janë punë të përditshme, jo thjesht të qeverisë, por të gjithë asaj pjese dërrmuese të shoqërisë që gjeneron punë, që jeton me punë, që prodhon, që shërben e kështu me radhë. Dhe ajo që është më e rëndësishmja është që duke bërë këtë, ne t’i japim një përmasë të re.”
