Anija kozmike Orion, pjesë e misionit Artemis II, ka arritur tashmë dy të tretat e rrugës drejt Hënës, bëri të ditur NASA përmes një njoftimi në rrjetet sociale.
Sipas agjencisë amerikane të hapësirës, gjatë ditës së katërt të fluturimit, katër astronautët në bord kanë vijuar përgatitjet për fazat e ardhshme të misionit, duke shqyrtuar planet për studimin e Hënës përpara fluturimit rreth saj. Paralelisht, ekuipazhi është angazhuar në ushtrime për kontrollin manual të anijes, një procedurë e rëndësishme për sigurinë dhe menaxhimin e fluturimit.
Megjithatë, në bord vazhdojnë të shfaqen probleme teknike të vogla, konkretisht me sistemin e tualetit. Sipas informacioneve të fundit, defekti lidhet me bllokimin e tubit të ventilimit, një çështje që ishte konsideruar e zgjidhur menjëherë pas nisjes.
Pavarësisht këtij problemi, misioni deri më tani është zhvilluar pa incidente të tjera të rëndësishme. Astronautët kanë përjetuar një udhëtim të qetë, ndërsa kapsula Orion, me një diametër rreth 5 metra, vijon rrugëtimin drejt objektivit të saj kryesor, fluturimin rreth Hënës dhe rikthimin e sigurt në Tokë.
Defekti në sistemin e menaxhimit të mbetjeve u evidentua në orët e para të ditës së tretë të misionit, por sipas NASA-s, situata mbetet nën kontroll dhe nuk paraqet rrezik për ekuipazhin.
