Qeveria shqiptare ka shpallur situatën e veçantë në tregun e hidrokarbureve, pas përshkallëzimit të krizës në Lindjen e Mesme dhe ndikimit të saj në çmimet e karburanteve edhe në vendin tonë.
Përmes një vendimi qarkullues të qeverisë, është vendosur futja në fuqi e Bordit të Transparencës, sikundër ishte paralajmëruar ditë më parë.
“Çmimet, që përcaktohen nga Bordi gjatë situatës së veçantë, janë të detyrueshme për të gjitha subjektet që ushtrojnë veprimtari në fushën e tregtimit të nënprodukteve të naftës dhe të gazit në vend”– thuhet në vendim.
Po ashtu, subjektet që ushtrojnë aktivitet në këtë sektor detyrohen të njoftojnë pranë ministrisë përgjegjëse për ekonominë përfaqësuesit e tyre në bord brenda datës 24 mars, çka sugjeron se Bordi do të jetë efektiv pas kësaj date.
Kujtojmë se ditët e fundit nafta në vendin tonë është tregtuar me rreth 214 lekë/ litër, nga 175 lekë/litër që ishte përpara nisjes së krizës.
