Çmimet e karburanteve në vend janë rritur sërish. Në disa pika, një litër naftë dhe benzinë po shitet për 198 lekë. Me 64 lekë është rritur çmimi i gazit.
“Po bëhet gjithnjë e më e vështirë të planifikosh udhëtimet e përditshme. Çdo rritje çmimi ndikon drejtpërdrejt në buxhetin familjar dhe, për ne që përdorim makinën çdo ditë, kjo është një barrë e madhe. Ndonjëherë na duket se çmimet rriten pa asnjë logjikë”,- shprehet një qytetar për A2 CNN.
Kjo është rritja e katërt e çmimit të karburanteve në vend. Në vetëm 48 orë nga operacioni amerikano-izraelit në Iran, në Shqipëri nafta dhe benzina kërcyen në 182 dhe 183 lekë për litër. Karburantet u rritën sërish më 6 dhe 8 mars, për të kulmuar të martën, më 10 mars.
“Shumë prej nesh po mendojnë të gjejnë alternativa, si përdorimi i transportit publik ose rritja e kursimeve në karburant. Por problemi është se nuk ka zgjidhje afatshkurtra dhe çdo rritje e menjëhershme na krijon stres dhe shqetësim. E kuptojmë se tregu ka luhatje, por efekti mbi qytetarët është shumë i dukshëm.”
Burime tregojnë se të martën, në ambientet e Ministrisë së Ekonomisë dhe Inovacionit, është zhvilluar një takim i dytë me përfaqësues nga tregu i karburanteve në vend.
“Deri tani, çdo diskutim duket i ngadaltë krahasuar me ritmin e rritjes së çmimeve. Si përdorues të zakonshëm, ne ndiejmë pasojat çdo ditë dhe çdo litër karburant është më i shtrenjtë,” shprehet një drejtues mjeti.
Ndërsa nafta po rritet, taksistët paralajmërojnë shtrenjtim të biletave të udhëtimit.
“Nëse kjo tendencë vazhdon, do të jemi të detyruar të rrisim tarifat për pasagjerët. Çdo rritje çmimi na prek drejtpërdrejt, sepse nafta është pjesa më e madhe e shpenzimeve tona. Ne përpiqemi të mos e kalojmë barrën te klientët”, shprehet një taksist.
Shoqata e Hidrokarbureve sqaron për A2CNN se çmimi i naftës caktohet sipas vlerave të ditës në bursë. Sipas tyre, importuesit e blejnë naftën në bursë, e sjellin dhe e mbajnë në magazinat e tyre doganore pa e zhdoganuar. Ditën që e hedhin në treg, i caktojnë çmimin sipas vlerës që ka bursa. Kjo praktikë shtrenjton automatikisht edhe çmimin e naftës me pakicë për konsumatorët.
