Konfindustria ka reaguar në lidhje me tensionet e regjistruara në Lindjen e Mesme, ç’ka ka ngritur alarmin për rritje të çmimeve të karburanteve në vendin tonë.
Përmes një reagimi zyrtar të ndarë për mediat, Konfindustria ka kërkuar nga qeveria që të ndërmarrë masa të menjëhershme ligjore për të mbrojtur tregun e karburanteve.
Konfindustria paralajmëron se çmimi i naftës ka dhënë shenja të menjëhershme rritjeje në bursë, çka pritet të ndikojë edhe në tregun vendor. Koha e zgjatjes së krizës në rajon mbetet e paqartë, ndaj sipas saj, ndërhyrjet e shpejta ligjore janë të domosdoshme për të shmangur pasoja ekonomike të rënda.
“Konfindustria, duke u nisur nga pasojat e paparashikuara të luftës në Gjirin Persik në ekonomi kërkon, që ekzekutivi të marrë masat e domosdoshme ligjore, sidomos në tregun e karburanteve. Së pari, duhet kontrolluar zbatimi i ligjit në kompanitë e karburanteve për sigurimin e rezervës strategjike 3 mujore. Së dyti, duhen marrë masat ligjore në drejtimin rregullator të konkurrencës në treg për të shmangur rrezikun e rikthimit të spekulimeve të çmimit të karburanteve si në rastin e krizës së luftës në Ukrainë në vitet 2021-22. Së treti, kërkojmë, që qeveria të përgatisë një paketë ligjore me synim uljen e barrës fiskale në rast të rritjes së fortë të çmimit të karburanteve në tregjet ndërkombëtare. Çmimi i naftës ka dhënë shenjat e menjëhershme të rritjes në bursë, duke e bërë të pashmangshme pasqyrimin edhe në tregun vendor. Koha e zgjatjes së luftës është e paqartë”,- thuhet në reagim.
