Ambasada e Shteteve të Bashkuara në Kuvajt ka njoftuar se do të mbetet e mbyllur deri në një njoftim të ri, për shkak të “tensioneve të vazhdueshme rajonale”.
Në një deklaratë të publikuar në platformën X, ambasada bëri të ditur se vendimi është marrë si masë paraprake sigurie, ndërsa janë anuluar të gjitha takimet konsullore, si ato të rregullta ashtu edhe rastet emergjente.
“Kemi anuluar të gjitha takimet konsullore, të rregullta dhe emergjente”, thuhet në njoftim, pa dhënë detaje shtesë mbi kohëzgjatjen e mbylljes.
Më herët, Departamenti i Shtetit i Shteteve të Bashkuara u bëri thirrje qytetarëve amerikanë në disa pjesë të Lindjes së Mesme, përfshirë Kuvajtin, që të largohen duke përdorur mjete komerciale, për shkak të “rreziqeve serioze të sigurisë”.
Mbyllja e ambasadës në Kuvajt vjen pas një incidenti gjatë natës, kur Ambasada e Shteteve të Bashkuara në Arabinë Saudite në Riad u sulmua nga dy dronë.
Autoritetet amerikane nuk kanë bërë të ditur ende nëse ka pasur dëme materiale apo persona të lënduar si pasojë e sulmit.
Situata e sigurisë në rajon mbetet e tensionuar, ndërsa autoritetet amerikane u kanë bërë thirrje qytetarëve të tyre të ndjekin me kujdes udhëzimet zyrtare dhe të qëndrojnë në kontakt me përfaqësitë diplomatike.
