Një zhvillim i papritur ka ndodhur pasditen e sotme në shtëpinë e “Big Brother VIP Albania 5”, ku ka mbërritur një zarf i zi, duke shtuar misterin dhe tensionin mes banorëve.
Ndërkohë, faqja zyrtare e formatit në Instagram ka njoftuar se televotimi aktual është anuluar. Sipas njoftimit, banorët nuk janë ende në dijeni të këtij vendimi, ndërsa detajet do të bëhen publike gjatë spektaklit të së shtunës.
Këtë javë në nominim ishin Rogerti, Selin, Gimbo dhe Gerta. Tre prej tyre u caktuan nga Juela, pasi ajo hapi “Kutinë e Pandorës” dhe zgjodhi emrat që do t’i bashkoheshin Rogertit, i cili ndodhej tashmë në televotim të përhershëm.
Vendimi për anulimin e televotimit ka rikthyer elementin e papritur që karakterizon formatin, duke e bërë situatën në shtëpi edhe më të tensionuar. Të shtunën mbrëma pritet që “Vëllai i Madh” të zbulojë arsyet dhe pasojat e këtij vendimi për lojën.
