Aktorja e njohur Rajmonda Bulku ka mbajtur një fjalim në protestën e thirrur nga Partia Demokratike, e cila po zhvillohet para godinës së Kryeministrisë në Tiranë.
Në fjalën e saj, Bulku kujtoi ngjarjet e 20 shkurtit 1991 dhe mbështetjen ndaj grevës së studentëve, duke theksuar se ajo periudhë përfaqësonte bashkim dhe guxim përballë sistemit komunist.
“Ju falënderoj që sot doni një fjalë edhe nga unë, të kujtoj atë ditë historike të 20 shkurtit 1991, kur ne ishim të gjithë të bashkangjitur me grevën heroike të studentëve tanë.
Me ta, nuk patëm frikë. Luftuam kundër një ushtrie që nuk duhet harruar se kishte Partinë Komuniste në krye,” u shpreh Bulku.
Ajo theksoi se fryma e asaj kohe ishte bashkimi dhe guximi për të përballuar një sistem që, sipas saj, kishte mohuar liritë për shumë vite.
“Kishim një frymë të gjithë bashkë, hoqëm frikën dhe morëm guximin tonë sepse deshëm lirinë, deshëm të rrëzonim sistemin që na kishte zaptuar dhe marrë lirinë tonë për shumë vite,” vijoi ajo.
“Dua të kujtoj atë frymë që ta sjellim këtu sot, atë dëshirë për të jetuar bukur në Shqipërinë tonë të bukur dhe ta bëjmë për jetët tona, fëmijët e nipërit tanë, të jetojnë më mirë në vendin e tyre sepse u takon. Të mos e braktisin këtë vend të bekuar. Zoti e ka bekuar Shqipërinë dhe bekoftë edhe shqiptarët,” përfundoi ajo.
