Manastiri i Zvërnecit në Lagunën e Nartës është përmbytur si pasojë e prurjeve të shumta të ujit dhe reshjeve intensive të ditëve të fundit dhe bllokimit të kanalit kullues.
Niveli i lartë i ujit ka depërtuar në ambientet e godinës, duke shkaktuar dëme materiale, kryesisht në katin e parë të ndërtesës.
Sipas priftit të manastirit, Jani Terezia, përmbytja ka shkaktuar dëmtime në ambientet e brendshme, ndërsa situata konsiderohet e pazakontë për nga përmasat.
“Fenomeni nuk ka ndodhur më parë në këto përmasa. Dyshohet se një nga shkaqet kryesore është bllokimi i kanalit të madh shkarkues, i cili nuk po e largon ujin drejt detit siç duhet”, u shpreh ai për mediat.
Manastiri i Nartës, i njohur si një nga objektet më të rëndësishme të trashëgimisë kulturore dhe fetare në zonën e Vlorës, përballet kështu me një situatë emergjente që kërkon ndërhyrje të shpejtë dhe zgjidhje të qëndrueshme.
