Irani dhe Rusia do të zhvillojnë nesër stërvitje të përbashkëta detare në Detin e Omanit dhe në pjesën veriore të Oqeanit Indian, sipas njoftimit të agjencisë gjysmëzyrtare iraniane Fars News Agency.
Lajmi vjen disa ditë pasi Islamic Revolutionary Guard Corps (IRGC) realizoi manovra ushtarake në Ngushticën e Hormuzit, një nga korridoret më strategjike për tregtinë globale të naftës.
Sipas Fars, komandanti i Marinës iraniane, Hassan Mahsudlou, deklaroi se objektivat e stërvitjes përfshijnë rritjen e koordinimit dhe bashkëpunimit përballë kërcënimeve ndaj sigurisë detare, si dhe luftimin e terrorizmit detar.
Zhvillimi i këtyre manovrave vjen në një moment tensionesh të shtuara në rajon. Në të njëjtën kohë, Shtetet e Bashkuara kanë rritur praninë ushtarake në Lindjen e Mesme, ku po operon aeroplanmbajtësja USS Gerald R. Ford, një nga dy aeroplanmbajtëset amerikane aktualisht të dislokuara në zonë.
Ndërkohë, vijojnë diskutimet mes Uashingtonit dhe Teheranit lidhur me programin bërthamor iranian. Analistët e sigurisë e shohin këtë zhvillim si pjesë të një gare të shtuar për ndikim dhe prani ushtarake në një rajon kyç për stabilitetin energjetik global.
