Policia ka marrë masa për zhvillimin e derbit të futbollit mes Partizani dhe KF Tirana, që luhet sot në orën 16:30 në Arenën Kombëtare.
Nga ora 14:00 deri në përfundim të aktivitetit do të bllokohen disa segmente rrugore, përfshirë Sheshin “Nënë Tereza”, rrugët “Lekë Dukagjini”, “Dervish Hima”, si dhe zonat përreth stadiumit.
Autoritetet kanë përcaktuar edhe itineraret e lëvizjes së tifozëve për të shmangur përplasjet dhe grumbullimet jashtë zonave të caktuara.
Policia do të shoqërojë tifozët përgjatë këtyre rrugëkalimeve dhe nuk do të lejojë devijime nga itinerari i miratuar.
Në hyrje të stadiumit do të kryhen kontrolle të rrepta për sende të ndaluara, si mjete të forta, bidonë uji, çadra, çelësa metalikë apo lëndë piroteknike.
Çdo tifoz duhet të jetë i pajisur me dokument identifikimi, ndërsa fëmijët nën 16 vjeç nuk do të lejohen pa prindin ose kujdestarin ligjor.
Gjithashtu, nuk do të lejohet hyrja e personave të identifikuar më parë si problematikë në aktivitete sportive.
Policia u bën thirrje tifozëve dhe qytetarëve të respektojnë masat dhe të shmangin lëvizjen me automjete në zonat e bllokuara gjatë orareve të përcaktuara.
