Policia e Durrësit ka arrestuar 37-vjeçarin Xhulio Golgota, inspektor pranë Autoritetit Portual Durrës, i cili ishte shpallur në kërkim në kuadër të hetimeve për çështjen e kontejnerëve me mbetje të rrezikshme.
Sipas njoftimit zyrtar, Gjykata e Shkallës së Parë e Juridiksionit të Përgjithshëm Durrës, me vendimin e datës 3 shkurt 2026, i kishte caktuar Golgotës masën e sigurisë “Arrest në burg” për veprën penale “Shpërdorimi i detyrës”.
Ai është një nga 33 personat për të cilët janë caktuar masa sigurie në kuadër të këtij hetimi, ndërsa në kërkim janë shpallur edhe 12 persona të tjerë të lidhur me ngjarjen.
“Specialistët e Sektorit për Hetimin e Krimeve Ekonomiko-Financiare kapën dhe ndaluan Xhulio Golgota, 37 vjeç, banues në Durrës, i cili ishte shpallur në kërkim pasi Gjykata e Shkallës së Parë e Juridiksionit të Përgjithshëm Durrës, me vendimin e datës 03.02.2026, i ka caktuar masën e sigurisë “Arrest në burg”, për veprën penale ‘Shpërdorimi i detyrës’”, thuhet në njoftimin e Policisë.
