Një 58-vjeçar ka përfunduar në prangat e policisë në Torino, pasi dyshohet se i ka marrë jetën nënës së tij 86-vjeçare dhe më pas ka fshehur trupin në një pyll pranë zonës së njohur si Palazzina di Caccia.
Sipas raportimeve nga mediat italiane, zhdukja e të moshuarës ishte denoncuar rreth një muaj më parë, ku shqetësimi ishte ngritur nga një mike e saj, e cila prej kohësh nuk kishte arritur të lidhej me 86-vjeçaren dhe kishte njoftuar autoritetet.
Gjatë hetimeve, policia mori në pyetje djalin e saj. Fillimisht, ai pretendoi se e ëma kishte ndërruar jetë për shkaqe natyrale dhe se ai ishte kujdesur për varrimin e trupit. Por më pas, përballë provave dhe kundërshtive në dëshmi, 58-vjeçari ndryshoi versionin, duke pranuar se e kishte vrarë dhe varrosur vetë.
Sipas deklarimeve të tij, motivi lidhej me frikën se do të humbiste pensionin e nënës, që përbënte të vetmin burim të ardhurash për të.
Trupi i pajetë është gjetur në zonën e treguar nga i dyshuari, ndërsa hetimet vijojnë për të sqaruar plotësisht dinamikën e ngjarjes. Autopsia pritet të hedhë dritë mbi shkakun e saktë të vdekjes.
