Ambasada e Shteteve të Bashkuara në Tiranë ka lëshuar një njoftim për qytetarët amerikanë në lidhje me protestën kombëtare që organizohet sot nga Partia Demokratike.
Në reagimin zyrtar, Ambasada u bën thirrje qytetarëve amerikanë të shmangin zonën e demonstratës dhe të ndjekin udhëzimet e autoriteteve për sigurinë.
“Ndërkohë që protestat dhe tubimet e mëdha shpesh fillojnë në mënyrë paqësore, situatat mund të ndryshojnë shpejt.
Protesta mund të zgjerohet në blloqet dhe ndërtesat qeveritare aty pranë, duke shkaktuar potencialisht ndërprerje të trafikut, devijime dhe mbyllje rrugësh”, thuhet në njoftim.
Protesta e PD-së do të zhvillohet këtë të martë, më 10 shkurt 2026, në orën 17:00. Protestuesit pritet të mblidhen përpara godinës së Kryeministrisë, në Bulevardin “Dëshmorët e Kombit”, mes Sheshit “Nënë Tereza” dhe Sheshit “Skënderbej”.
