Një ngjarje e rëndë familjare është shënuar pasditen e së hënës në Elefsina të Greqisë, ku një 71-vjeçare humbi jetën pasi u përplas nga makina që drejtohej nga vajza e saj.
Sipas mediave greke, 44-vjeçarja ishte kthyer në banesë së bashku me nënën dhe fëmijët e saj, pasi i kishte marrë më herët nga shkolla. Teksa po përpiqej të parkonte automjetin, e moshuara zbriti nga mjeti për ta ndihmuar me orientimin.
Gjatë manovrës, dera e pasagjerit mbeti e hapur dhe, në rrethana të paqarta, shoferja shtypi aksidentalisht pedalin e gazit. Automjeti lëvizi me shpejtësi mbrapsht, duke e bllokuar 71-vjeçaren mes derës së hapur dhe një peme pranë rrugës.
Ngjarja ndodhi në prani të fëmijëve, të cilët shpërthyen në lot, ndërsa fqinjët që dëgjuan britmat nxituan për të dhënë ndihmë. Sipas dëshmive të banorëve, situata ishte tronditëse dhe vajza e viktimës ndodhej në gjendje të rënduar psikologjike.
E moshuara u transportua me urgjencë nga shërbimi i emergjencës EKAB në Spitalin “Thriasio”, ku mjekët konstatuan vdekjen e saj.
Autoritetet greke arrestuan 44-vjeçaren me akuzën e vrasjes nga pakujdesia, ndërsa hetimet për zbardhjen e plotë të rrethanave vijojnë.
