Një rrugë në zonën e Shkozës në Tiranë është kthyer prej rreth një muaji në një rrezik serioz për banorët dhe kalimtarët, pas shembjes së një pjese të saj, pa asnjë ndërhyrje nga autoritetet përgjegjëse.
Një banor i zonës ka denoncuar situatën për JOQ, duke theksuar se gjendja e rrugës ka krijuar frikë të përditshme tek komuniteti, pasi ekziston rreziku real që persona apo mjete të rrëshqasin dhe të bien poshtë për shkak të mungesës së masave të sigurisë.
Sipas denoncuesit, pavarësisht se problemi është i njohur prej javësh, institucionet shtetërore dhe vendore nuk kanë ndërmarrë asnjë veprim për riparimin apo bllokimin e zonës së rrezikshme.
Për të shmangur aksidentet, banorët janë detyruar të veprojnë vetë, duke vendosur gurë dhe shirit sinjalizues, masa këto të përkohshme dhe aspak të mjaftueshme.
“Ka një muaj që rruga është shembur dhe është shumë e rrezikshme. Kemi frikë të kalojmë, sepse rrezikojmë të biem poshtë. Vetëm disa gurë dhe shirit sinjalizues i kemi vendosur ne si banorë. Shteti nuk ka marrë asnjë masë”, shprehet banori në mesazhin e tij.
