Është shtyrë seanca në GJKKO për dosjen Plumbi i Artë. Mësohet se shkak për shtyrjen e seancës është bërë mungesa e njërit prej të pandehurve të çështjes, Nuredin Dumani.
Ishte avokati mbrojtës i të pandehurit Gentian Sharra, i cili kërkoi prezencën e të penduarit të drejtësisë Dumani, me qëllim ballafaqimin e deklaratave mes palëve. Nuredin Dumani nuk ka qenë i pranishëm kryesisht në seancat e fundit gjyqësore.
“Kërkojmë shoqërimin e detyrueshëm të bashkëpunëtorit të drejtësisë Nuredin Dumani, duke qenë se jemi në fazën e dhënies së deklarimeve nga ana e të pandehurit Henrik Hoxha. Në këtë mënyrë mund të bëhet ballafaqimi mes këtyre dy personave”, tha avokati Sokol Hazizaj.
SPAK e kundërshtoi këtë kërkesë me argumentin: Nuk jemi përballë kundrathënieve, në këto kushte kërkesa nuk qëndron. I kërkojmë gjykatës rrëzimin e saj.
Gjykata e Posaçme vlerësoi se nuk ndodheT përpara kushteve ligjore për të bërë shoqërimin e detyrueshëm të bashkëpunëtorit të drejtësisë, megjithatë tha se do shprehet më vonë lidhur me këtë kërkesë. Seanca e radhës u caktua më datë 3 shkurt në orën 10:00.
