Dokumente të panjohura më parë nga mbrojtja daneze tregojnë se Ministria e Mbrojtjes dhe udhëheqja e lartë ushtarake daneze ishin të shqetësuar se Shtetet e Bashkuara, në mënyrë informale dhe pa përfshirë Kopenhagenin, po përpiqeshin t’i bindnin kolegët danezë në Groenlandë të dorëzonin informacione në lidhje me instalimet ushtarake, portet dhe bazat ajrore në Groenlandë.
Kështu raporton gazeta daneze Berlingske, e cila i referohet dokumenteve të vitit 2025, të Forcave të Armatosura dhe Ministrisë së Mbrojtjes së Danimarkës, të cilat i ka parë në një version të redaktuar për arsye të sigurisë kombëtare.
Sipas gazetës, kontakti dyshohet të ketë ndodhur jashtë kanaleve zyrtare, përkatësisht Ministrisë së Punëve të Jashtme, Ministrisë së Mbrojtjes dhe udhëheqjes ushtarake daneze. Dokumentet tregojnë se një ushtarak amerikan, në dy raste brenda një intervali prej gjashtë ditësh gjatë janarit 2025, i ka kërkuar informacion Komandës së Arktikut, strukturës ushtarake daneze përgjegjëse për Groenlandën.
Berlingske shkruan se kërkesat lidhen me infrastrukturën e Groenlandës. Herën e parë kërkesa është bërë më 16 janar 2025, ndërsa më 26 janar Ministria e Mbrojtjes është njoftuar sërish se i njëjti person i paidentifikuar kishte kërkuar informacion shtesë.
Ministria u informua menjëherë për shkak të “klimës strategjike” në lidhje me Groenlandën. Po ashtu u informua edhe e gjithë udhëheqja e lartë e mbrojtjes daneze, përfshirë Shefin e Mbrojtjes.
Zhvillimet vijnë në një kohë kur presidenti amerikan Donald Trump ka deklaruar vazhdimisht gjatë vitit të kaluar se SHBA-të synojnë të marrin kontrollin e Groenlandës, duke përshkallëzuar së fundmi edhe retorikën. Të shtunën, Trump shkroi në rrjetin social Truth Social se Danimarka dhe disa vende evropiane do të përballen me tarifa shtesë për shkak të mosmarrëveshjeve mbi Groenlandën.
Në fillim të janarit 2025, konkretisht më 7 janar, Groenlandën e kishte vizituar edhe Donald Trump Jr., djali i presidentit amerikan. Megjithatë, sipas Berlingske, mbetet e paqartë nëse informacioni i kërkuar iu dorëzua realisht SHBA-së dhe, nëse po, çfarë përmbajtjeje kishte ai. Gazeta thekson se është e qartë që forcat daneze në Groenlandë iu përgjigjën kërkesave amerikane me mirësi dhe frymë bashkëpunimi.
Ministria daneze e Mbrojtjes nuk ka pranuar të komentojë mbi këtë çështje. Ndërkohë, Ambasada amerikane në Kopenhagen i tha gazetës se “nuk duhet të habisë askënd” fakti që SHBA-të mbajnë dialog dhe kontakte me partnerët në Groenlandë dhe Danimarkë, “teksa punojmë së bashku për të garantuar sigurinë në të gjithë aleancën dhe në Arktik”.
