Ish-deputeti demokrat Ervin Salianji deklaroi se Partia Demokratike nuk ka pësuar asnjë ndryshim të vërtetë që nga viti 2013, as në organizim, as në zgjedhjen e lidershipit dhe as në mënyrën e të bërit politikë.
I ftuar në emisionin “Off the Record” të Andrea Dangllit, Salianji theksoi se edhe sot në PD garojnë të njëjtat figura që kanë qenë aktive më shumë se një dekadë më parë.
“Që nga 2013 nuk ka ndryshuar asgjë, as mënyra e promovimit të karierës, as mënyra e bëries së zgjedhjeve, as gjuha politike, dhe fatkeqësisht apo fatmirësisht, sepse ne jemi kolegë me një pjesë që nuk kanë ndryshuar as njerëzit.
Pra, ne jemi sot në vitin 2026 dhe përgjithësisht, në masën më të madhe, garuesit janë ata që kanë qenë në vitin 2013.”, tha ai.
Ish-deputeti bëri të ditur se ka nisur turin e takimeve në qarqe për të dëgjuar demokratët dhe për të identifikuar problematikat reale të partisë.
Ai paralajmëroi se në përfundim të këtij procesi do të dalë publikisht me një platformë konkrete reformimi, që synon ta kthejë PD-në në një forcë fituese, me rregulla të qarta për karrierën politike, gjuhë të re dhe lidhje reale me shoqërinë.
