Presidenti amerikan Donald Trump njoftoi se vendet që vazhdojnë të bëjnë “biznes” me Iranin do të përballen me një tarifë të re prej 25%, në kuadër të presionit ekonomik ndaj Teheranit.
Trump nuk dha detaje se cilat veprimtari përfshihen në këtë masë, duke lënë të paqartë nëse tarifa do të aplikohet vetëm për mallra, apo edhe për shërbime dhe transaksione të tjera ekonomike.
Kina në qendër të goditjes
Kina mbetet partneri më i madh tregtar i Iranit, me mbi 4 miliardë dollarë mallra të importuara në vitin 2023, sipas Observatorit të Kompleksitetit Ekonomik.
Aktualisht SHBA-të aplikojnë tarifa rreth 20% ndaj mallrave kineze, ndërsa masat e reja mund t’i çojnë ato deri në 45%.
Shtetet e prekura nga masat
Irani eksporton produkte në më shumë se 120 vende.
Sipas të dhënave të disponueshme:
91% e eksporteve shkojnë në Azi,
8% në Evropë,
rreth 1% në pjesën tjetër të botës.
Kjo do të thotë se shumë ekonomi aziatike, përfshirë Indinë, Turqinë, Emiratet e Bashkuara Arabe dhe vende të Azisë Juglindore, mund të përballen me detyrime të reja tregtare nëse administrata amerikane i zbaton realisht këto masa.
