Partitë politike të Groenlandës kanë kundërshtuar ashpër deklaratat e Presidentit amerikan, Donald Trump, i cili ka sugjeruar se mund të marrë kontrollin e ishullit Arktik, madje edhe me forcë, për të shmangur ndikimin rus ose kinez.
Në një deklaratë të përbashkët, liderët e pesë partive kryesore në parlamentin e Greenlandës theksuan se e ardhmja e territorit duhet të vendoset vetëm nga banorët vendas.
“Ne nuk duam të jemi Amerikanë, nuk duam të jemi Danezë – duam të jemi Greenlandezë,” thuhet në deklaratë të shpërndarë nga kryeministri Jens-Frederik Nielsen.
“Asnjë vend tjetër nuk mund të përcaktojë të ardhmen tonë. Vendimet do të merren këtu, pa presion dhe pa ndërhyrje.”
Sipas mediave të huaja, parlamenti i Groenlandës, Inatsisartut, pritet të mbledhë një seancë të jashtëzakonshme për të diskutuar zhvillimet dhe për të garantuar një debat të hapur dhe gjithëpërfshirës për të drejtat e popullit.
