Ka vijuar në mungesë gjyqi ndaj ish-zëvendëskryeministrit Arben Ahmetaj, i cili akuzohet për shpërdorim detyre në dosjen “Buka”.
Seanca është shoqëruar me përplasje mes avokatit mbrojtës Henrik Ligori dhe prokurorit të SPAK, Elvin Gokaj, ndërsa në sallë ishin të pranishëm edhe përfaqësues të familjes Myderizi, palë e dëmtuar në çështje.
Avokati Ligori deklaroi se Ahmetaj nuk e pranon akuzën, e konsideron procesin politik dhe kërkoi që klienti i tij të pyetet në distancë përmes videokonference.
Ndërkohë, ish-zëvendëskryeministri ndodhet ende në arrati, nga ku ka hedhur akuza të forta ndaj qeverisë edhe kryeministrit Edi Rama të cilin e ka quajtur kreu i organizatës kriminale.
Dosja “Buka” lidhet me privatizimin e shoqërisë shtetërore “Buka sh.a.”, periudhë gjatë së cilës SPAK pretendon se Ahmetaj, në postin e ministrit të Financave, ka ndërhyrë në mënyrë të paligjshme në proces duke shpërdoruar detyrën.
Sipas prokurorisë, vendimet dhe aktet e firmosura prej tij kanë favorizuar një grup privat dhe kanë sjellë dëm ekonomik për shtetin, si dhe kanë cenuar interesat e familjes Myderizi, pronarë të tokës në të cilën operonte kompania.
