Kemi ka udhëtuar drejt Delvinës, për rastin e aksidentit të ndodhur më 8 mars 2024, i cili i mori jetën një gruaje 58-vjeçare, punonjëse e Bashkisë Delvinë.
Djali i viktimës tregon, se vetëm tre ditë pas tragjedisë, në banesën e familjes është paraqitur një avokat, Ardian Dauti.
Sipas dëshmisë së tij, avokati kaloi menjëherë në biseda pazari, duke i premtuar familjes, se do ta fitonte çështjen, pasi kishte njohje personale me ekspertin e Sarandës, Andrea Baxheri, dhe prokurorin e çështjes, Kledion Llaho.
Familjarët pretendojnë, se avokati u ka nxjerrë në telefon këta persona gjatë bisedës, por për shkak të dyshimeve të krijuara, ata vendosën të mos e pajtonin avokatin Dauti. Sipas familjarëve të viktimës, drejtuesi i automjetit ka vuajtur vetëm disa muaj burg dhe më pas është lënë i lirë.
“Dy-tre ditë pasi në shtëpi na erdhi avokati Ardian Dauti. Na tregoi që ishte informuar nga prokurori i çështjes, Kledion Llaho. Na bëri të njohur në shtëpi që çështjen do e shikonim ne. Asi e shikonte këtë gjë si një biznes. Të shokuar ne nuk po kuptonim asgjë. Për ta besuar më shumë më tha që do më lidhte të flisja në telefon me prokuronin e çështjes. Dhe kështu ndodhi. Pas një ore më merr në të telefon avokati dhe më nxjerr në telefon Andrea Baxherin dhe më thotë që me këtë avokat e ke të fituar këtë çështje. Pastaj më merr përsëri në telefon dhe më thotë që foli pak këtij mikut tim, dhe të më nxori prokurorin. E bëri të lehtë që fajin e ka pasur shoferi dhe çdo gjë ishte e lehtë me këtë avokat. Po kur erdhën në shtëpi, të shokuar, kuptuar që ne nuk e kërkonim këtë gjë, ne kërkonim vetëm drejtësinë. Me kë do të bënim biznes, me gjakun e mamasë. Në fakt pamë se si qe në të vërtet çështja, se si atje po luhej çdo gjë”, tha djali i të ndjerës.
Ata pretendojnë gjithashtu, se dinamika e aksidentit është manipuluar nga ekspertët.“Stop” ka siguruar pamje filmike nga kamerat e një biznesi pranë vendit të ngjarjes, ku konstatohet, se automjeti ka qenë me shpejtësi mbi normat e lejuara dhe ka qarkulluar në korsinë e kundërt, duke përplasur të ndjerën.
Gjithashtu, “Stop” ka siguruar tre akte ekspertimi, të hartuara nga gjashtë ekspertë të ndryshëm. Në këto akte dinamika e aksidentit është ndryshuar në mënyra të ndryshme, duke nxjerrë fajtore viktimën.
Në asnjë prej akteve nuk është pasqyruar saktë pozicionimi i automjetit në momentin e përplasjes. Sot familjarët kërkojnë drejtësi, për humbjen e njeriut të shtrenjtë, pasi autori i ngjarjes është i lirë./ Emisioni STOP
