Reshjet e dendura të borës dhe rrëshqitjet e shpatit të malit kanë bllokuar akset Zallë–Dardhë dhe Zallë–Reç, duke izoluar banorët e njësisë administrative Zallë–Reç.
Ndërhyrja e Bashkisë Dibër ka nisur vetëm pas orëve të gjata të bllokimit, duke ngritur pikëpyetje mbi gatishmërinë dhe menaxhimin e emergjencave nga autoritetet vendore.
Banorët shprehen se mungesa e mjeteve të specializuara dhe vonesa në reagim i ka lënë të izoluar në kushte të vështira atmosferike. Situata është përkeqësuar edhe më tej në njësinë administrative Sllovë, ku rrugët vijojnë të jenë të bllokuara.
Pavarësisht se reshjet e borës janë të zakonshme në Dibër, mungesa e një plani të qartë parandalues bën që fshatrat e thella të mbeten çdo vit të izoluar, duke rrezikuar furnizimin me ushqime dhe shërbime bazë.
