Nga Boldnews.al
Diella e vërtetë e kryeministrit Rama, ose Linda (Mirlinda Karçanaj) e AKSHI-t (Agjencisë Kombëtare të Shoqërisë së Informacionit) nuk do dalë më nga shtëpia, duke munguar me shkelqimin e saj. Mjeshtrja, ose zysha e tenderave sekrete për “sigurinë teknologjike” të një vendi që si ka mbetur gjë pa ju hekeruar e publikuar, mësoi masën “arrest shtëpie”, në lidhje me abuzimin me të paktën 12 tendera me vlera qindra milionë euro.
Bashkë me Lindën, që vrau teknologjinë u dha “arrest me burg” edhe për profesor Beqirin, biznesmenin Ermal Beqiri që ishte lubia e vërtetë e thithjes së tenderave, pas së cilës fshihet një abuzim që as grushtetasit ushtarakë që marrin pushtetin në Afrikë, nuk arrijnë ta bëjnë dot.
Zysha dhe profesori kanë hesape për të larë, por gjithçka është bërë në sytë e të madhit apo për të madhin. Të mos ngatërrohemi… I madhi në mesazhet e Belës mban edhe nofkën përkedhelëse “palloshi i gjatë”.
Ndërsa zysh Lindën (Diellën, që dritë i pastë vepra që la), nuk do e shohim ca kohë, Belën, të adhurueshmën tjetër, nuk ka si e lëshon lehtë. Prokuroria Speciale kërkoi në Parlament heqjen e imunitetit të Belinda Ballukut për të vendosur masë arresti për të “arret shtëpie”, ose “arrest me burg”.
Rama dha shenja se nuk do të votojë pro heqjes së imunitetit të saj, por jashtë publikes, aty ku thurren fatet qeverisëse mbi shpinën qytetare, mësohet se i ka kërkuar të adhurueshmes të japë dorëheqje, por refuzimi i saj e vendos para sprovës që nuk mund të fshihet.
“Këtë herë na kërkohet të japim opinionin tonë, ne do të angazhohemi me të gjithë përgjegjësinë tonë përpara shqiptarëve që na dhanë 83 mandate”, tha Rama për çështjen Balluku, duke treguar jo pa qëllim forcën e kartonit.
Ai vetë ndjen paprekshmërinë dhe mbetet ende në skenarët e parashikuara prej tij, duke e bërë më interesante skenarin në shfaqjeve të radhës, në një telenovelë që shërben për “skllevërit” të cilët kënaqen me bukë dhe shfaqje. Personazhet si zysh Mirlinda, zysh Bela dhe profesor Beqiri janë në fakt pasqyra ku kryeministri shfaqet çdo ditë në adhurimin e vetes, ndonëse si mbret i dalë krejtësisht çullak!
