Hyrjet dhe daljet e Tiranës janë përfshirë nga kaosi i trafikut gjatë fundjavës, ndërsa mijëra qytetarë janë nisur drejt qyteteve dhe zonave turistike për të kaluar festat e fundvitit pranë familjeve të tyre.
Fluksi i madh i automjeteve ka paralizuar qarkullimin në disa prej akseve kryesore, duke nxjerrë në pah mungesën e menaxhimit efektiv nga ana e Policisë Rrugore.
Që në orët e para të mëngjesit, trafiku u rëndua ndjeshëm në hyrje-daljet e kryeqytetit, veçanërisht në segmentin nga Instituti drejt Kthesës së Kamzës, si dhe në drejtim të Durrësit.
Edhe autostrada Tiranë–Durrës, megjithëse më e qarkullueshme, u përball me kolona të gjata mjetesh, sidomos në zonën e Kasharit.
Probleme janë evidentuar edhe në Unazën e Madhe, nga diga e Liqenit Artificial deri te mbikalimi i Pallatit me Shigjeta, ku për orë të tëra qarkullimi ka qenë i ngadalësuar.
