Një analizë e publikuar nga The New York Times shpjegon arsyet pse Rusia ka gjasa ta refuzojë planin e ri 20-pikësh për përfundimin e luftës në Ukrainë, të paraqitur nga presidenti ukrainas Volodymyr Zelensky me mbështetjen e Shteteve të Bashkuara.
Sipas gazetës amerikane, me këtë plan Zelensky ka tentuar të riformulojë negociatat duke i vendosur ato në një kornizë që përfshin garanci sigurie për Ukrainën dhe një plan të qartë për rindërtimin e vendit pas luftës. Presidenti ukrainas e ka cilësuar propozimin si një kompromis “të arsyeshëm” krahasuar me nismat e mëparshme të diskutuara në nëntor.
Megjithatë, reagimi fillestar nga Moska vlerësohet të jetë negativ. New York Times thekson se Kremlini ndihet i përforcuar nga situata në terren dhe i kufizuar politikisht nga vështirësia për të pranuar një marrëveshje që nuk do të perceptohej si fitore brenda Rusisë.
Analistë rusë e kanë cilësuar planin si të papranueshëm. Alexei Naumov, analist i çështjeve ndërkombëtare, e përshkroi atë si një “tallje absolute”, duke argumentuar se qëllimi i tij është t’u paraqitet amerikanëve si kompromis dhe më pas të fajësohet Rusia për dështimin e negociatave.
Sipas artikullit, Vladimir Putin ka këmbëngulur prej dy vitesh në dy kushte themelore: tërheqjen e forcave ukrainase nga pjesët e mbetura të rajoneve Donetsk dhe Luhansk, si dhe përjashtimin e anëtarësimit të Ukrainës në NATO. Ky qëndrim u rikonfirmua edhe në konferencën e fundit vjetore për shtyp të presidentit rus.
Plani ukrainas parashikon tërheqjen e forcave ruse nga rajone si Dnipropetrovsk, Mykolaiv, Sumy dhe Kharkiv, si dhe krijimin e zonave të çmilitarizuara në pjesë të Donetskut, por vetëm nëse Rusia tërhiqet nga territore ekuivalente. Sipas New York Times, pikërisht çështja e territoreve dhe e centralit bërthamor të Zaporizhias mbetet një nga pengesat kryesore për çdo marrëveshje.
Gazeta vëren gjithashtu se, ndonëse lufta ka kosto të larta ekonomike dhe ushtarake për Rusinë, Kremlini beson se ka ende më shumë për të fituar duke e vazhduar konfliktin. Fluksi i vazhdueshëm i rekrutëve dhe kontrolli i një pjese të madhe të rajonit të Donetskut e forcojnë këtë bindje.
Në planin diplomatik, New York Times shkruan se Moska ka interes të mbajë të hapur kanalin e negociatave me Uashingtonin, kryesisht për të shmangur sanksione të reja dhe për të mos u paraqitur si pala që refuzon paqen. Megjithatë, sipas analistëve, kjo mbetet më shumë një lojë taktike sesa një sinjal real për përfundimin e luftës.
