Nga Boldnews.al
Të enjten e kësaj jave (18 dhjetor 2025), trupa gjykuese e drejtuar nga Miliana Muça, merr në shqyrtim ankimin e Ballukut për vendimin e shkallës së parë, e cila vendosi në datë 19 nëntor “pezullimin nga detyra”, një qëndrim që u konfirmua edhe në seancën “për verifikimin e zbatimit të masës”, në datë 22 nëntor.
Vendimi i Gjykatës Kushtetuese, i marrë javën e kaluar, për të pezulluar përkohësisht vendimin e Gjykatës së Posaçme për “pezullimin nga detyra” të zv.kryeministres dhe njëkohësisht Ministres së Infrastrukturës, Belinda Balluku, vendos Gjykatën e Posaçme të Apelit një kazus të ri dhe të pahasur më parë.
Përballë kësaj situate “siu generis”, trupa gjykuese e Apelit të Posaçëm mund të gjendet përballë tre alternativave;
Alternativa e parë (dhe më logjike) është që Gjykata e Posaçme e Apelit të konfirmojnë vendimin e shkallës së parë për “pezullimin nga detyra”. Në aspektin procedurial penal, ekzistojnë faktorët për të mbajtur në fuqi vendimin e Gjykatës së Posaçme të Shkallës së Parë.
Belinda Balluku është marrë e pandehur për “aferën e Tunelit të Llogarasë”. Në vlerësimin e Prokurorisë së Posaçme, zonja Balluku mund të prishë provat apo të indimidojë dëshmitarët, falë pushtetit të saj shumë të madh si numri dy i pushtetit ekzekutiv.
Pra, teorikisht, e pandehura Belinda Balluku mund të mbahet në masë ndaluese, në të mirë të hetimit dhe gjykimit penal.
Nga ana tjetër, lëvizja më e fundit e Prokurorisë së Posaçme, e cila kërkon nga Parlamenti, Autorizimin për arrestimin e deputetes (dhe ministres) Balluku, pritet të forcojë bindjen e Gjykatës së Apelit të Posaçëm që prokurorët kanë më shumë se një arsye për të besuar se qëndrimi i saj në detyrë, do të shkatërrojë hetimin dhe gjykimin.
Por, ndërkohë, vendimi i Gjykatës Kushtetuese, i cili vendosi “pezullimin” e vendimit të gjykatës së shkallës së parë, ka krijuar bindjen tek juristë të ndryshëm se kjo do të ndikojë drejtpërdrejtë edhe në vendimin e Apelit.
Vendimi i Gjykatës Kushtetuese nuk është përfundimtar, pasi themeli i çështjes pritet të shqyrtohet në 22 Janar 2026. Në këto kushte, Gjykata e Posaçme e Apelit mund të konfirmojë vendimin e “pezullimit” nga detyra të Belinda Ballukut, por mund ta shtyjë zbatimin e saj deri në vendimin përfundimtar të Gjykatës Kushtetuese.
Alternativa e dytë është që Gjykata e Apelit të Posaçëm, pas vlerësimit të provave, mund të krijojë bindjen se nuk ekzistojnë kushtet që Belinda Balluku të jetë e pezulluar nga detyra dhe ta shfuqizojë vendimin e gjykatës së shkallës së parë.
Një vendim i tillë, vetëm një ditë para se Këshilli i Mandateve dhe Imuniteteve në Parlament të marrë në shqyrtim kërkesën e Prokurorisë së Posaçme për arrestimin e Ballukut, mund t’i krijonte lehtësira të mëdha asaj vetë, kryeministrit Edi Ramë, por edhe maxhorancës socialiste.
Të gjithë këta do të kenë një argument më shumë në dorë për të refuzuar kërkesën e SPAK-ut, duke argumentuar se Gjykata e Apelit të Posaçëm vlerëson që ndaj Ballukut nuk ka nevojë për një masë sigurimi të lehtë, siç është ai i “pezullimit nga detyra”, rrjedhimisht, një masë më e rëndë, si arresti, me shumë mundësi, do të konsiderohet e palogjikshme dhe e papranueshme.
Alternativa e tretë është që Gjykata e Apelit të Posaçëm të krijojë ndonjë “artificë” për shtyrjen e seancës gjyqësore, në rastin më të mirë, për të parë sjelljen e Këshillit të Mandateve dhe Imuniteteve në Parlament.
Nëse deputetët socialistë, në variantin më pak të mundshëm, autorizojnë SPAK-un për arrestimin e Belinda Ballukut, Gjykata e Posaçme e Apelit do ta ketë shumë të lehtë të konfirmojë vendimin e shkallës së parë për pezullimin e saj nga detyra.
Nëse deputetët socialistë, me shumë mundësi, do të pengojnë arrestimin e Ballukut, atëherë trupa gjykuese e Apelit, edhe pas një “shtyrje të mundshme”, do të duhet që të zgjedhë një prej dy alternativave të para-ta rrëzojë “pezullimin” ose ta konfirmojë e ta shtyjë zbatimin derisa të shprehet Gjykata Kushtetuese.
