Bashkimi Evropian ka vendosur të rishikojë planin për ndalimin total të makinave me motorë me naftë dhe benzinë nga viti 2035, duke adoptuar një qasje më fleksibile për industrinë automobilistike.
Sipas paketës së re të miratuar nga Komisioni Evropian, pas vitit 2035 prodhuesit e automjeteve do të duhet të arrijnë një ulje prej 90% të emetimeve nga shkarkimi, ndërsa 10% e mbetur do të kompensohet përmes përdorimit të materialeve me emetime të ulëta karboni, si çeliku i prodhuar në BE, apo përmes karburanteve alternative, përfshirë e-karburantet dhe biokarburantet.
Kjo do të thotë se edhe pas vitit 2035 do të lejohen automjetet hibride plug-in, “mild hybrid”, ato me “range extender”, si dhe disa mjete me motor me djegie, për sa kohë që plotësojnë kriteret e reja të emetimeve.
Qasje më fleksibile për industrinë
Komisioni Evropian thekson se objektivi klimatik i BE-së nuk vihet në diskutim. “Elektrifikimi mbetet motori kryesor i transformimit të flotës automobilistike në dekadën e ardhshme”, deklaroi nënkryetari i Komisionit Evropian, Stéphane Séjourné, duke nënvizuar se çdo emetim shtesë do të duhet të kompensohet plotësisht që në burim.
Ky ndryshim kursi është përshëndetur veçanërisht nga Gjermania dhe Italia, të cilat prej muajsh kanë kërkuar më shumë fleksibilitet dhe neutralitet teknologjik. Kancelari gjerman Friedrich Merz e cilësoi vendimin si një hap drejt harmonizimit të objektivave klimatike me realitetin ekonomik dhe mbrojtjen e vendeve të punës.
Edhe ministri italian i Ndërmarrjeve dhe “Made in Italy”, Adolfo Urso, e vlerësoi paketën si një hap pozitiv, megjithëse kërkoi masa më të thella. Ndërkohë, presidenti i Confindustria-s, Emanuele Orsini, e kritikoi vendimin si të pamjaftueshëm, duke paralajmëruar pasiguri për industrinë.
Ndryshime për mjetet e rënda dhe flotat e kompanive
Paketa e re parashikon gjithashtu rregulla më fleksibile për emetimet e CO₂ për mjetet e rënda, si dhe objektiva të përcaktuara në nivel kombëtar për flotat e kompanive, me synimin për të nxitur përdorimin e automjeteve me emetime zero ose të ulëta.
Stimuj për prodhimin evropian
BE-ja do të lidhë mbështetjen financiare publike me automjetet me emetime të ulëta ose zero që prodhohen në Evropë. Deri në vitin 2034, prodhuesit do të përfitojnë nga “super-kreditë” për prodhimin e makinave elektrike të vogla dhe të përballueshme, të prodhuara në BE.
Gjithashtu, Komisioni Evropian ka lançuar planin “Battery Booster” me vlerë 1.8 miliardë euro, që synon zhvillimin e një zinxhiri të plotë evropian për prodhimin e baterive. Nga kjo shumë, 1.5 miliardë euro do të përdoren për të mbështetur prodhuesit evropianë të qelizave të baterive përmes kredive pa interes, duke filluar nga viti i ardhshëm.
