Deputeti i Partisë Demokratike, Klevis Balliu, ka reaguar pas vendimit të Gjykatës Kushtetuese që pezulloi vendimin e GJKKO-së për zv.kryeministren dhe ministren e Infrastrukturës, Belinda Balluku.
Në një postim në rrjetet sociale, Balliu akuzoi qeverinë dhe ministren Balluku për korrupsion dhe keqpërdorim të fondeve publike, duke e cilësuar vendimin si “rikthim të aferave qeveritare”.
“Kthehet Bela për të vazhduar aferat me Ramën. Patronazhistët hedhin fishekzjarre, mbase nga “gëzimi”, sepse rikthehet skema e vjedhjes së popullit më të varfër në Europë.
Ndërkohë që qeveria merret me sulme ndaj opozitës, super-hajdutja e kryehajdutit rikthehet për të vijuar abuzimet me paratë e qytetarëve.
Qeveria financon propagandën dhe sulmet politike ndaj opozitës vetëm për të mbuluar vjedhjet e saj ndaj shqiptarëve”, shkruan Balliu.
