Ambasadori i Bashkimit Europian në Tiranë, Silvio Gonzato, ka reaguar pas zgjedhjes së Klodian Brahos në krye të Prokurorisë së Posaçme (SPAK).
Në një prononcim për mediat, Gonzato uroi drejtuesin e ri dhe theksoi se ajo që Bashkimi Europian ka kërkuar vazhdimisht është që kreu i SPAK të ketë nivele të larta pavarësie dhe integriteti.
“Kemi ardhur këtu për të treguar mbështetjen tonë për Këshillin e Lartë të Prokurorisë dhe për të shprehur interes për procesin e emërimit. SPAK ka rol thelbësor në luftën kundër krimit dhe korrupsionit. Ajo që kërkojmë është që kryetari të ketë nivele të larta pavarësie dhe integriteti. Uroj z. Braho dhe mirëpresim bashkëpunimin me të në vijim,” – u shpreh Gonzato.
Kush është Klodian Braho
Braho është prokurori, i cili ka hetuar inceneratorin e Elbasanit, duke nxjerrë urdhër arresti për shumë persona mes të cilëve, Mirel Mërtiri, Stela Gugallja, Klodian Zoto dhe duke ndarë hetimin për ish zv/kryeministrin Arben Ahmetaj.
Braho ka hetuar gjithashtu dosjen 5D duke dërguar në gjyq ish-drejtorët e Bashkisë së Tiranës.
Një tjetër dosje e hetuar dhe e dërguar në gjyq nga prokurori është edhe ajo e njohur si “Toyota Yaris” ku janë të përfshirë edhe shumë njerëz të drejtësisë. Kjo dosje është e ndarë në disa fraksione dhe janë duke u hetuar edhe pjesë të tjera të saj.
Gjithashtu Klodian Braho është pjesë edhe e grupit të prokurorëve që firmosën dosjen për ish-ministrin e mbrojtjes Fatmir Mediu, tashmë në proces gjyqësor, nën akuzën për “shpërdorim detyre” në lidhje me rolin e tij si ministër në masakrën e Gërdecit.
