Ish-deputeti i Partisë Demokratike, Ervin Salianji, ka deklaruar se lëvizja që ka ndërmarrë synon rizgjimin dhe rigjenerimin e forcës së djathtë, duke rikthyer aktivizimin e anëtarëve dhe strukturave të partisë.
Në një intervistë në A2 CNN, Salianji u shpreh se Partia Demokratike është më aktive dhe më e pranishme në publik, por ka ende nevojë për ndryshime të brendshme që përcaktojnë qartë mënyrën e avancimit politik.
“Dhe besoj se kjo ka ndodhur. E ka realizuar qëllimin ky format. PD sot është më aktive, më e zgjuar, është më shumë prezente në media dhe pa diskutim një ndryshim ku disa kritere duhet të përcaktohen, se si avancohet karriera në PD. Nëse janë primaret, apo votat, çfarëdolloj kriteri të vendoset”, tha Salianji.
Salianji theksoi se pakënaqësitë brenda bazës demokrate lidhen me neglizhencën dhe braktisjen nga drejtuesit lokalë.
“Janë qindra dhe mijëra demokratë që mendojnë se unë që PD duhet të ripërtërihet”, shtoi ai.
“E mbani mend çfarë bënë socialistët për një video të Ilir Metës. Ndërsa opozita tani nuk po arrin të kapitalizojë. Për shkak të ndalimit për të kandiduar në Parlament, unë kam folur në platformat e mia në rrjetet sociale dhe në takime me njerëzit”, u shpreh ai.
