Greqia është goditur nga moti i keq dhe reshje të dendura shiu që kanë shkaktuar përmbytje masive në disa zona të vendit. Situata ka krijuar kaos në qarkullim dhe pasiguri për banorët, ndërsa autoritetet janë vënë në gatishmëri.
Sipas mediave greke, disa rrugë janë kthyer në lumenj, ndërsa automjete janë bllokuar nën ujë. Një nga pamjet më dramatike tregon një makinë të zhytur pothuajse plotësisht, brenda së cilës ndodhej një familje.
Falë ndërhyrjes së shpejtë të forcave të shpëtimit, u arrit që të gjithë anëtarët e familjes të nxirreshin në kohë dhe të shmangej një tragjedi.
Meteorologët paralajmërojnë se reshjet intensive do të vijojnë edhe në orët në vijim, sidomos në pjesën qendrore dhe perëndimore të Greqisë, ndërsa qytetarëve u kërkohet të shmangin lëvizjet e panevojshme.
