Në Kuvend u debatua sot projektligji për ndërprerjen e marrëveshjes me fondacionin gjerman Hanns Seidel, pjesë e CSU-së, forcë politike që qeveris Gjermaninë së bashku me CDU-në.
Deputeti i Partisë Demokratike, Tritan Shehu, e cilësoi largimin e fondacionit si një humbje të rëndë për Shqipërinë.
Shehu theksoi se Hanns Seidel është një fondacion me reputacion të lartë, i angazhuar në mbrojtjen e vlerave europiane, demokracisë, ekonomisë së tregut dhe dinjitetit të njeriut.
Shehu akuzoi qeverinë se nuk është e interesuar për praninë e organizatave serioze ndërkombëtare, duke pretenduar se “regjimi do errësirë”.
“Unë do të flas për pikërisht në lidhje me marrëveshjen me fondacionin Hans Zajdel.
E njoh mirë këtë fondacion. Kam pasur mundësinë të bashkëpunoj me këtë fondacion që në vitin 1992, kur ky fondacion filloi aktivitetin në atë Shqipëri të atëhershme të dalë nga komunizmi me një marrëveshje të ratifikuar nga ky parlament. Gjë e cila e ngre në nivelin e bashkëpunimit me këtë fondacion në stadin më të lartë.
Është një fondacion i shkëlqyer. Është pjesë e CSU-së gjermane, që tashmë është pjesë e qeverisjes së bashku me CDU-në. Është një fondacion me një reputacion të madh, që mbron vlerat europiane, vlerat e demokracisë, vlerat e ekonomisë së tregut, që mbron dinjitetin e njeriut. Përfitoj nga rasti për ta falenderuar thellësisht fondacionin në fjalë, Hans Seidel, CSU-në gjermane, CDU-në gjermane, e cila nëpërmjet këtij fondacioni dhe Konrad Adenauer-it, ka qenë pjesë e zhvillimeve demokratike shqiptare duke dhënë një kontribut të shkëlqyer në vendin tonë.
T’i kërkojmë qeverisë shqiptare të negociojë seriozisht me këtë fondacion. Sepse ka një status të veçantë. Është një ratifikim në parlament. – tha Shehu.
